အခန်း (၈၀)
လယ်ယာသုံး ပစ္စည်းရောင်းချခြင်းမှ ထုတ်လုပ်ခြင်းဆီသို့….
ကံကောင်းချင်တော့ ဖုန်းယွီသည် ထိုတင်သွင်းသည့် လယ်ယာသုံးပစ္စည်းများ၏ စာရွက်စာတမ်း ရှိနေသည်။ သူသည် ယင်းစာရွက်စာတမ်းများကို မှောင်ခိုပစ္စည်းတိုက်ဖျက်ရေးအဖွဲ့ကို တင်ပြလိုက်ပြီး ကုမ္ပဏီဆိုင်းငံ့ခံရမှုက ပြေလျော့သွားသည်။ ထိုက်ဟွကုန်သွယ်ရေးကုမ္ပဏီ၏ ဘဏ်အကောင့်သည်လည်း ပြန်ပွင့်သွားသည်။ သို့သော် ဖုန်းယွီက မပျော်ရွှင်ပေ။ သူက မြို့တော်အစိုးရအရာရှိများ၏ သတိပေးခြင်းကို ခံထားရသည်။ သူသာ ဆိုဗီယက်ပြည်ထောင်စုမှ စျေးချိုသည့်စက်ပစ္စည်းများကို တင်သွင်းသည့်အခါ သူတို့၏ညွှန်ကြားချက်အတိုင်း စျေးတင်မရောင်းပါက အခြားသောဌာနများသည်လည်း သူ၏ကုမ္ပဏီကို တဖန် ဆိုင်းငံ့ခံရအောင် လုပ်မည်ဖြစ်သည်။
သို့သော် ယင်းတင်ပို့သည့် စီးပွားရေးက အမြတ်သုံးဆယ်ရာခိုင်နှုန်းနီးပါးရပြီး သူသည် ဖြန့်ချီရေးလမ်းကြောင်းကိုလည်း တည်ဆောက်ခဲ့ပြီး ဖြစ်သည်။ ဖုန်းယွီသည် ထိုအရာကို အရှုံးပေးရန် ဆန္ဒမရှိပေ။
ဖုန်းယွီက သက်ပြင်းချနေသည်။ ထိုအရာများအားလုံးက သူ့တွင် အာဏာအလုံအလောက်မရှိ၍ ဖြစ်သည်။ သူသည် လက်ရှိတွင် ယွမ်သန်းထောင်ပေါင်းများစွာ ပိုင်ဆိုင်ခဲ့လျှင် မြို့တော်၏လက်ထောက်မြို့တော်ဝန်နှင့် ပြည်နယ်လက်ထောက်မြို့တော်ဝန်တောင် သူ့ကို ဒုက္ခပေးရဲမည် မဟုတ်ပေ။
အရင်က စုန့်ရှောင်ဖုန်းသည် ဖုန်းယွီကို ဒုက္ခပေးရဲသည်။ အကြောင်းမှာ ထိုက်ဟွကုန်သွယ်ရေးက ကုမ္ပဏီသေးသေးလေးတစ်ခု ဖြစ်နေဆဲ ဖြစ်သောကြောင့်ပင် ဖြစ်သည်။ အကယ်၍ ထိုက်ဟွကုန်သွယ်ရေးက ဘင်းမြို့တော်တွင် အကြီးဆုံးကုမ္ပဏီဖြစ်ပါက ဖုန်းယွီ၏အဖမ်းခံရမှုက စုန့်လောင်စီထက် အနည်းငယ်ပိုမည် ဖြစ်ကာ စုန့်ရှောင်ဖုန်းတောင် ဖုန်းယွီကို ထိရဲမှာ မဟုတ်ပေ။
တစ်စုံတစ်ယောက်က လေးစားခံရသည့် အတိုင်းအတာတစ်ခုထိ ရောက်ပါက ထိုအရာက အာဏာနှင့် ခွန်အားအဖြစ် ပြောင်းလဲလိုက်ခြင်းပင် ဖြစ်သည်။
ကျန်းရွေ့ချင်က ဖုန်းယွီကို လုံးဝရှင်းလင်းအောင် လုပ်ခဲ့ပေသည်။ သူသည် ယင်းလယ်ယာသုံးစက်ပစ္စည်းများကို တင်သွင်းလိုလျှင် သူက ဘင်းမြို့တော်၏ စက်ယန္တရားစက်ရုံနှင့် သေချာပေါက်ပြောရပေမည်။
နောက်တစ်နေ့တွင် ဖုန်းယွီသည် ကျောင်းတစ်ရက် ထပ်ခွင့်တိုင်လိုက်ကာ ဘင်းမြို့တော်၏ စက်ယန္တရားစက်ရုံသို့ လီရှစ်ချင်နှင့်အတူ လီမင်တကို တွေ့ရန်အတွက် သွားခဲ့သည်။
“မင်းတို့နှစ်ယောက်က ထိုက်ဟွကုန်သွယ်ရေးကလား၊ နိုင်ငံခြားကုန်သွယ်ရေးဌာနရဲ့ လက်ထောက်အရာရှိ ကျန်းရွေ့ချင်က မင်းကို ကူညီလို့ လွတ်သွားတာ၊ မဟုတ်ရင် စဉ်းစားနေစရာတောင် မလိုတော့ဘူး၊ ဘင်းမြို့တော်နဲ့ ပတ်သတ်သမျှ ကိစ္စအကုန်လုံးက မြို့တော်ရဲ့အစိုးရဆီကို ရောက်မှာပဲ ”
လီမင်တက သူ့လက်ဖက်ရည်ကို ဖြည်းဖြည်းချင်း သောက်လိုက်သည်။ သူက သူ့လူများကို ပြည်နယ်အတွင်းရှိ ရောင်းချသူများထံလွှတ်ပြီး သူတို့ကို သတိပေးလိုက်သည်။ ထိုနေရာများတွင် ဆိုဗီယက်ပြည်ထောင်စုမှ စက်ပစ္စည်များ ရှိတော့မည် မဟုတ်ပေ။ အကယ်၍ သူတို့က ထိုက်ဟွကုန်သွယ်ရေးမှ စက်ပစ္စည်းများကို အမှာစာတင်ရဲပါက သူက ထိုက်ဟွကုန်သွယ်ရေးကို ပိတ်သိမ်းအောင် တွန်းအားပေးမည်ပင် ဖြစ်သည်။
ထိုရောင်းချသူများသည်လည်း ထိုက်ဟွကုမ္ပဏီဆိုင်းငံ့ခံရသည့်သတင်းကို ရရှိကြသည်။ ဆိုင်းငံ့ခံရမှုက တခဏအတွင်း လွတ်မြောက်သွားသော်လည်း ထိုက်ဟွကုန်သွယ်ရေးက သူတို့ကို ဆိုဗီယက်ပြည်ထောင်စုမှ လယ်ယာသုံးစက်ပစ္စည်းများ ဆက်လက်တင်သွင်းတော့မည် မဟုတ်ကြောင်း ပြောသည်။
“ဒါရိုက်တာလီ ခင်ဗျားက ကျွန်တော်တို့ကို တောင်းပန်စကားပြောဖို့ လာမယ်လို့ ထင်နေတာလား ”
ဖုန်းယွီက ခြေထောက်ကို တင်ပျင်ခွေချိတ်ထိုင်ကာ ပြောလိုက်သည်။ သင်က တစ်ယောက်ယောက် အနိုင်ကျင့်တာကို ခံရသောအခါ သင် သူ့ကို မည်သည့်အခါမှ အရှုံးမပေးသင့်ပေ။ အကယ်၍ သင် အရှုံးပေးပါက အနိုင်ကျင့်သူက သင့်ကို ကြောက်လန့်သည်ဟု တွေးပြီး သူက ပိုပြီး အထက်စီးဆန်မည်ပင် ဖြစ်သည်။
လီမင်တ၏မျက်နှာက ပြောင်းလဲသွားသည်။ ယင်းအဓိပ္ပာယ်က အဘယ်နည်း။ ဘာကြောင့် မတောင်းပန်ရသနည်း။ ထို့နောက် သူက ပီတိတွေစားဖို့ ရောက်လာခဲ့တာလား။ စက်ယန္တရားစက်ရုံ၏နောက်တွင် မြို့တော်အစိုးရရှိသည်။ အလွန်သေးငယ်သည့် နိုင်ငံခြားကုန်သွယ်ရေးဌာနက မနှိုင်းယှဉ်နိုင်ပေ။
“အဲ့ဒါဆိုရင် မင်းတို့နှစ်ယောက်က ပြဿနာဖန်တီးဖို့ ဒီကို ရောက်လာတာလား၊ မင်းတို့လို ထိုက်ဟွကုမ္ပဏီသေးသေးလေးတစ်ခုက ဘာလုပ်နိုင်မလဲဆိုတာ ငါ ကြည့်ချင်မိပါရဲ့ ”
လီရှစ်ချင်က ဖုန်းယွီကို စိုးရိမ်တကြီးဖြင့် ကြည့်လိုက်သည်။ ဖုန်းယွီက သူ့ကို ဤနေရာသို့ လာရသည့်အကြောင်းရင်းမှာ ပြဿနာရှာရန်ဟု မပြောခဲ့ပေ။ သူတို့က တွေ့ရုံသာ တွေ့ပြီး စတင်ငြင်းခုံကြသည်။ ထိုအဓိပ္ပာယ်က သူတို့အနေဖြင့် ဆိုဗီယက်ပြည်ထောင်စုမှ လယ်ယာသုံးစက်ပစ္စည်းများကို နောက်ထပ် မတင်ပို့နိုင်သည်လား။
အကယ်၍ သူတို့သည် အနာဂါတ်တွင် ယင်းစီးပွာရေးကို လုပ်ကိုင်လျှင်တောင် လီမင်တကို ပြန်မခုခံရဲပေ။ လီမင်တကို အစိုးရအရာရှိတစ်ယောက်ဟု စဉ်းစား၍ ရနိုင်ပြီး သူက မြို့တော်အစိုးရနှင့်လည်း ကောင်းမွန်သည့်ဆက်ဆံရေးရှိသည်ဟု ပြောနိုင်သည်။ သူ့တွင် သူတို့၏ ကုမ္ပဏီကို ပိတ်သိမ်းနိုင်သည့် နည်းလမ်းများစွာ ရှိသည်။
ရုတ်တရက်တွင် ဖုန်းယွီက ရယ်ကာ ပြောလိုက်သည်။
“ဒါရိုက်တာလီက ကျွန်တော့်ကို နားလည်မှု လွဲနေတာပဲ၊ ကျွန်တော် ဒီကို တောင်းပန်ဖို့ လာတာလည်းမဟုတ်ဘူး၊ ပြဿနာဖန်တီးဖို့ လာတာလည်း မဟုတ်ဘူး၊ ကျွန်တော် ဒီကို လာရတဲ့အကြောင်းရင်းက ဒါရိုက်တာလီအနေနဲ့ဆိုဗီယက်ပြည်ထောင်စုရဲ့ အဆင့်မြင့်စက်ပစ္စည်း ထုတ်လုပ်ရေးနည်းစနစ်တွေကို လိုချင်မလားလို့ လာမေးတာ ”
လီရှစ်ချင်က လန့်ဖျပ်သွားသည်။ ယခုကဲ့သို့ စကားဝိုင်းမျိုး ဘယ်လိုပြောင်းလဲလိုက်တာပါလိမ့်။ လီမင်တက မတ်တပ်ထရပ်လိုက်သည်။ ဆိုဗီယက်ပြည်ထောင်စုက သူတို့၏အဆင့်မြင့်စက်ပစ္စည်း ထုတ်လုပ်မှု နည်းစနစ်များအား တရုတ်ကို ရောင်းမည်မဟုတ်ပေ။ ဤဖုန်းယွီက ယင်းထုတ်လုပ်သည့် စနစ်များကို သူ့လက်ထဲရောက်အောင် စွမ်းဆောင်နိုင်သည်လား။
“ဘာအဓိပ်ပာယျလဲ ”
“ကျွန်တော်က ဆိုဗီယက်ပြည်ထောင်စုက အဆင့်မြင့်စက်ပစ္စည်းတွေကို တင်ပို့နိုင်ပြီး စိုက်ပျိုးရေးစက်ပစ္စည်းတွေကို ထုတ်လုပ်နိုင်တဲ့ နည်းပညာတွေ အပါအဝင်ဆိုရင် မင်းတို့တွေဘက်က ဘယ်လောက်ကမ်းလှမ်းနိုင်မလဲ ”
ဆိုဗီယက်ပြည်ထောင်စု၏ စီးပွားရေးကျဆင်းမှုက စတင်ပြီး ဖြစ်သည်။ အရင်က ဆိုဗီယက်ပြည်ထောင်စုသည် ရွှေ၊ ဆီနှင့် တပ်မတော်လက်နက်ပစ္စည်းများကို တင်ပို့ရာတွင် ဦးဆောင်ခဲ့ကာ သူတို့၏ စီးပွားရေးတိုးတက်မှုကို ထိန်းသိမ်းထားသည်။ သို့သော် ယခုတွင် ယင်းပစ္စည်းများတွင် မှောင်ခိုလှုပ်ရှားမှု အများအပြားရှိနေသည်။ အစိုးရအဆင့်မြင့် စစ်ဘက်အရာရှိနှင့် သူတို့၏ မိသားစုဝင်များတောင် ယင်းမှောင်ခိုလှုပ်ရှားမှုများတွင် ပါဝင်နေကြသည်။ သူတို့က သူတို့၏ ကြွယ်ဝချမ်းသာမှုကို သူတို့၏မျိုးဆက်အား လက်ဆင့်ကမ်းလို၍ ဖြစ်သည်။
ကီရီလန်ကိုနှင့် သူ့စီးပွားရေးမိတ်ဘက်များသည် အဆင့်မြင့်စစ်ဘက်အရာရှိများ၏ ဒုတိယမျိုးဆက် ဖြစ်ပေသည်။ သူတို့၏ ကုန်တင်ရထားက ဆိုဗီယက်ပြည်ထောင်စုစစ်တပ်မှ ပိုင်ဆိုင်ပြီး သူတို့၏ ရည်ရွယ်ချက်အတွက် ယင်းကို အသုံးပြုနေကြတာ ဖြစ်သည်။ ထို့အပြင် သူတို့က စစ်တပ်အမည်ခံပြီး စီးပွားရေးလုပ်ပါက အခွန်အခလည်း ပေးစရာမလိုပေ။
၁၉၈၅ နောက်ပိုင်းတွင် လယ်ယာစိုက်ပျိုးရေးလုပ်ငန်းများ၊ အထူးသဖြင့် အစားအသောက်ထုတ်လုပ်ရေးလုပ်ငန်းသည် အားပျော့လာခဲ့သည်။ ယင်းက ဆိုဗီယက်ပြည်ထောင်စုရဲ့ လယ်ယာသုံးစက်ပစ္စည်းများ၏ ရောင်းအားကို တစ်နေ့ထက်တစ်နေ့ ကျရန် ဦးတည်ခဲ့သည်။
သူတို့သည် ဥရောပကို တင်ပို့ခဲ့ကြသည်။ သို့သော် ယခုတွင် ယင်းစျေးကွက်ကို ဂျာမနီနိုင်ငံနှင့် ပြင်သစ်နိုင်ငံတို့က လက်လွှဲယူလိုက်သည်။ ဂျာမနီက ဥရောပစျေးကွက်၏ တစ်ဝက်ကျော်တောင် ပိုင်ဆိုင်ထားသည်။
ဆိုဗီယက်ပြည်ထောင်စုအနေဖြင့် ဥရောပကို လယ်ယာသုံးစက်ပစ္စည်းများတင်ပို့ပါက သူတို့အနေဖြင့် စက်ပစ္စည်းများ၏စျေးနှုန်းကို လျော့ချရန် လိုအပ်သည်။ သို့သော် စျေးလျော့လျှင် အရှုံးဖြစ်သွားမည်ဖြစ်ပြီး သူတို့က ဂျာမန်လူမျိုးနှင့် ပြင်သစ်လူမျိုးများကို အရှုံးပေးခြင်း ဖြစ်ကြောင်း သတိပေးလိုက်ရာ ရောက်ပေသည်။ ဆိုဗီယက်က ဘာလုပ်နိုင်မည်နည်း။ သူတို့က သူတို့၏သွားကို ကြိတ်ရုံသာရှိပြီး ရှေ့ဆက်ရုံသာ ရှိသည်။
နောက်တစ်နေ့ကြာပြီးနောက် စက်ရုံအများစုသည် သူတို့၏ထုတ်လုပ်မှု ရပ်တန့်သွားပေမည်။ ၁၉၉၀ ပြည့်နှစ်တွင် ဆိုဗီယက်ပြည်ထောင်စုက ပိုဆိုးလာကာ ပျက်စီးသွားပေမည်။ ထို့နောက် ဆိုဗီယက်ပြည်ထောင်စု၏ တရားဝင်ပြိုကွဲခြင်း စတင်မည် ဖြစ်ပေသည်။ လွန်ခဲ့သည့် ရက်အနည်းငယ်က ဖုန်းယွီသည် ကီရီလန်ကိုထံ လယ်ယာသုံးပစ္စည်းများ မှာယူသည့်အခါက သူသည် ကီရီလန်ကိုကို ယင်းထုတ်လုပ်သည့်နည်းစနစ်အကြောင်း မေးခဲ့သည်။ ဖုန်းယွီသည် ယင်းပစ္စည်းထဲမှ တစ်ခုကို တင်ပို့နိုင်ခဲ့လျှင် သူတစ်ယောက်ထဲသာ ယင်းမှ အကျိုးအမြတ်ရမည် ဖြစ်သည်။ သို့သော် သူသာ ထုတ်လုပ်သည့်နည်းပညာကို ယူဆောင်နိုင်ခဲ့ပြီး ထုတ်လုပ်နိုင်ခဲ့ပါက တရုတ်တစ်နိုင်ငံလုံးအကျိုးဖြစ်ထွန်းပေမည်။
ဖုန်းယွီသည် မြင့်မြတ်သည့်သူတစ်ယောက် မဟုတ်ပေ။ သို့သော် သူ ငွေဝင်သည့်လမ်းကြောင်းကို ရှာတွေ့ပြီး တစ်ချိန်တည်းတွင် သူ့နိုင်ငံ၏စီးပွားရေးအတွက် တစ်ခုခုလုပ်မည်ပင် မဟုတ်ပေလော။ ထပ်ပြောရလျှင် ဖုန်းယွီသည် မြို့တော်အစိုးရနှင့် နီးစပ်သည့်အခွင့်အရေးလည်း ရမည်ဖြစ်ကာ သူ့ကုမ္ပဏီတိုးတက်ဖို့အတွက် လမ်းခင်းပေးရာလည်း ရောက်ပေမည်။
လီရှစ်ချင်က ဖုန်းယွီနှင့် လီမင်တတို့ စကားအကြာကြီးပြောသည်ကိုသာ အမှတ်ရသည်။ ပထမတွင် သူတို့နှစ်ယောက်ကြား ပွတ်တိုက်မှုတစ်ချို့ ရှိခဲ့ပြီး သို့သော် နောက်ပိုင်းတွင် ပွတ်တိုက်မှုက ပြေလျော့သွားသည်။ လီမင်တက ဖုန်းယွီကို သူကိုယ်တိုင် တံခါးထိလိုက်ပို့ပြီး တက်တက်ကြွကြွဖြင့် လက်ကိုင်ကာ နှုတ်ဆက်လိုက်တော့သည်။
ရုံးသို့ ပြန်ရောက်သည့်အခါ ဝန်ထမ်းများ အားလုံးက ပိုကာကို ပျော်ရွှင်စွာ ကစားနေကြသည်။ အကြောင်းမှာ သူတို့က ပျင်းရိနေကြသည့်အတွက် ဖြစ်သည်။ သူတို့က ဖုန်းယွီဝင်လာသည်ကို တွေ့သည့်အခါ ပိုကာကတ်များကို အလျင်အမြန်သိမ်းလိုက်ကြသည်။
“အရာရာအားလုံးက အခု အဆင်ပြေသွားပြီ၊ အိမ်ပြန်ပြီး ရက်အနည်းငယ်လောက် အနားယူလို့ရတယ်၊ ပြီးတော့ အမျိုးသားနေ့အားလပ်ရက်ပြီးရင် ပြန်ခဲ့၊ အစ်ကိုလီ သူတို့အကုန်လုံးကို အပိုဆုအဖြစ် ယွမ်ငါးရာပေးလိုက်ပါ၊ ပြီးတော့ သူတို့ရဲ့ စွမ်းဆောင်မှုအတွက် ကော်မရှင်ခ နှစ်ထောင်လည်း ပေးလိုက်ပါ၊ သူတို့တွေက ရောင်းချသူတွေနဲ့ ဆက်သွယ်ခဲ့တယ်လေ ”
ဖုန်းယွီက စိတ်ကောင်းဝင်နေသည်။ ပြီးနောက် သူသည် တစ်ချိန်တည်းတွင် ပိုရက်ရောရန် ဆုံးဖြတ်လိုက်သည်။ သူက အပိုဆုကြေးကို နှစ်ဆမြှင့်ကာ ဆုအဖြစ် ပေးလိုက်သည်။ သူက ထိုလူငယ်များကို သူ့အား လေးစားစေချင်သည်။ သူက ယင်းလူများကို သူကိုယ်တိုင် လေ့ကျင့်ပေးထားတာ ဖြစ်ကာ မည်သူ့ကိုမှ ထွက်မသွားစေချင်ပေ။
လူတိုင်းက ပျော်ရွှင်နေကြပြီး ယမန်နေ့က အကြောင်းကို ပြန်တွေးတောကြည့်ပါက သူတို့၏ ကုမ္ပဏီသည် မနက်ခင်းတွင် ဆိုင်းငံ့ခံလိုက်ရသည်။ သူတို့က ကုမ္ပဏီပိတ်သိမ်းရပြီဟု တွေးခဲ့သည်။ သို့သော် ညနေခင်းတွင် ဆိုင်းငံ့မှုက လွတ်မြောက်သွားသည်။ ပြီးနောက် ဖုန်းယွီက ဘာမှ မဖြစ်ခဲ့သလို ဖြစ်သည်။ ယနေ့တွင် ဖုန်းယွီက သူတို့၏အပိုဆုကြေးနှင့် ကော်မရှင်ခကို ကြေငြာလိုက်သည်။ အမြင့်မားဆုံးကော်မရှင်ခနှင့် အပိုဆုရရှိသည့်တစ်ဦးမှာ ယွမ်ကိုးရာနီးပါးဖြစ်ပေသည်။ ယင်းမှာ သူတို့ စက်ပစ္စည်းစက်ရုံတွင် အလုပ်လုပ်သည့်အလုပ်သမား၏ တစ်နှစ်စာ လစာနှင့် ညီမျှပေသည်။
လီရှစ်ချင်က အပိုဆုကြေးများနှင့် ကော်မရှင်ခများကို ထုတ်ပေးပြီးနောက် ဖုန်းယွီသည် အချို့သောအရာများကို စတင် ဘာသာပြန်တော့သည်။ စက္ကူအချို့တွင် ရုရှားဘာသာစကားဖြင့် ရေးထားခြင်း ဖြစ်သည်။ ထို့နောက် သူသည် အရာအာလုံးကို ဘာမှမရှိသည့် စက္ကူပေါ်ကို ယူလိုက်သည်။ သူက ယင်းစက္ကူများကို စာတိုက်ရုံးသို့ ယူလိုက်ပြီး ကီရီလန်ကိုထံ နိုင်ငံခြားဖုန်းခေါ်ဆိုမှုနှင့် fax ပို့လိုက်သည်။
“ဖုန်း မင်းတကယ်ပဲ စက်ပစ္စည်းထုတ်တဲ့နည်းစနစ်နဲ့ နည်းပညာတွေ လိုချင်တာလား၊ အဲ့ဒီအရာတွေက လွယ်လွယ်နဲ့တော့မရဘူး၊ လူတွေက အဲ့ဒါကို ရောင်းရင်တောင် စျေးနှုန်းကတော့ နည်းမှာ မဟုတ်ဘူး ”
ကီရီလန်ကိုက ပတ်ဝန်းကျင်ကို စတင်မေးတော့သည်။ ပိတ်သိမ်းခါနီးအဆင့်ရှိ လယ်ယာသုံးစက်ပစ္စည်းထုတ်လုပ်သည့် စက်ရုံများရှိသော်လည်း ထိုစက်ရုံများက သူတို့၏ ထုတ်လုပ်သည့်လမ်းကြောင်းကို မရောင်းချင်ကြပေ။
“ငါ့ရဲ့ချစ်စရာကောင်းတဲ့ သူငယ်ချင်းအစ်ကိုကီ အစ်ကို့မှာ သေချာပေါက် နည်းလမ်းရှိမှာပါ၊ ကျွန်တော်တို့တွေ ပိုက်ဆံအကြောင်းကို နောက်ကျ ပြောတာပေါ့ စိတ်မပူပါနဲ့၊ ကျွန်တော့်ရဲ့ သူငယ်ချင်းကို ရှုံးအောင် မလုပ်ပါဘူး ”
“အဲ့တာဆိုလည်း ကောင်းပြီ၊ ငါ အကောင်းဆုံးကြိုးစားပြီး တစ်ပတ်အတွင်း မင်းဆီ အကြောင်းပြန်မယ် ”
———
