အခန်း (၈)
ယခု ရှန်းထင်ရွှမ်းက လုမင်ဟွေ့နှင့် တခြားသူများကို အသီးများ တတ်နိုင်သမျှ မြန်မြန် ရောင်းစေချင်သည်။
ပိုင်လျန်စူပါမားကတ်အနီးမှ ရှင်းယွမ်ရှန်သို့ ၄၅မိနစ်ခန့် မောင်းရပေသည်။
လုမင်ဟွေ့နှင့် စွန်းဖျင်က ယနေ့ အလွန်ကံကောင်းသည်ဟု ခံစားနေရသည်။ သူတို့က ကားပိတ်သည်ကို မကြုံတွေ့ခဲ့ရပေ။ သူတို့က မီးပွိုင့်အားလုံးနီးပါး စိမ်းနေသည်ကိုသာ ကြုံတွေ့ခဲ့ရသည်။ ထို့ကြောင့် သူတို့က ပိုင်လျန်နှင့် အနီးဆုံးသို့ ရောက်ရန် ၃၀မိနစ်ခန့်သာ ကြာခဲ့ပေသည်။
စွန်းဖျင်က ရှင်းယွမ်ရှန်မှ စထွက်လာသောအခါ စူပါမားကတ်၏ တာဝန်ရှိသူကို တိုက်ရိုက် ဖုန်းခေါ်လိုက်ပြီး ပြောလိုက်သည်။
ထို့ကြောင့် စူပါမားကတ်၏ ပို့ဆောင်ရေးဌာနဝန်ထမ်းတွေက နောက်ဘက်တွင် အတော်ကြာကြာ စောင့်ဆိုင်းနေခဲ့ပြီး ကုန်ပစ္စည်းများအတွက် များစွာသောစင်များကို ပြင်ဆင်ထားခဲ့သည်။
ကားရောက်သည်ကို မြင်သောအခါ လူတိုင်းက အသီးများရွေ့ရန် အလျင်စလို ရောက်လာကြသည်။ စုစုပေါင်း ၁၀၀၀ ကတ်တီခန့်ရှိသော အသီးများက ရှန်းထင်ရွှမ်းတို့ သုံးယောက်အတွက် များပြားသော်ငြား စူပါမားကတ်တွင်မူ အလုပ်သမား အများအပြားရှိပေသည်။ လူတိုင်းက အသီးများကို စူပါမားကတ်ထဲသို့ တစ်ခေါက်ထဲဖြင့် ရွှေ့လိုက်ကြသည်။
စျေးရောင်းသည့် သူများကလည်း သူတို့၏နေရာတွင် အဆင်သင့် ရှိနေကြသည်။ အသီးများကို စူပါမားကတ်ထဲတွင် နေရာချထားပြီး သူတို့က အသီးများကို စတင်ကောက်ယူလိုက်ကာ စင်များပေါ်တွင် ၎င်းတို့ကို ထားလိုက်သည်။
ဤအချိန်တွင် စူပါမားကတ်ကို လာလည်ကြသည့် လူများစွာ ရှိပေသည်။ ရှောင်းလျှိုက သူတို့ထဲမှ တစ်ယောက် ဖြစ်သည်။ သူမက ဆီးသီးများနှင့် မက်မွန်သီးများကို စင်ပေါ်တွင် နေရာချနေသော ဝန်ထမ်းတစ်ယောက်ကို မြင်လိုက်သည်။
ထိုအသီးနှစ်မျိုးက တစ်ချက်ကြည့်ရုံဖြင့် အပင်မှ အခုလေးတင် ခူးလာသည်ဟု သိနိုင်သည်။ ၎င်းတို့က အလွန် လတ်ဆတ်ပုံ ပေါ်နေသည်။
ရှောင်းလျှိုက စျေးနှုန်းကို တဖန် ကြည့်လိုက်သည်။ ဆီးသီးများက တစ်ကတ်တီကို ၁၀ ယွမ်ဖြစ်ပြီး ၎င်းဘေးရှိ မက်မွန်သီးများက တစ်ကတ်တီကို ၂၀ ယွမ် ဖြစ်သည်။
မနီးမဝေးတွင်ရှိသော ဆီးသီးများကို ကြည့်လိုက်ရာ တစ်ကတ်တီကို ၅ယွမ်သာ ရှိပေသည်။ သို့သော် သူမက နှိုင်းယှဉ်ကြည့်ပြီး ၁၀ ယွမ်ပေးရသော ဆီးသီးများက ပိုကောင်းသည်ကို တွေ့ရှိသွားသည်။
ရှောင်းလျှိုက ဆီးသီးနှင့် မက်မွန်သီးများကို ကတ်တီဝက်စီ ချိန်လိုက်သည်။
နေ့လယ်တွင် စူပါမားကတ်ထဲသို့ဝင်လာသော လူအုပ်အနည်းငယ် ရှိပေသည်။ ရှောင်းလျှိုက တန်းစီပြီး နောက်ဆုံးတွင် စူပါမားကတ်မှ ထွက်သွားနိုင်တော့သည်။ သူမက ဤအချိန်အတွင်း စူပါမားကတ်သို့ ထပ်လာတော့မည် မဟုတ်ဟု တွေးပြီး သက်ပြင်းချလိုက်သည်။
အသီး၏သင်းပျံ့နေသည့် ရနံ့က အိတ်အတွင်းမှ ထွက်ပေါ်လာသည်။ ရှောင်းလျှိုက အိတ်ထဲမှ ဆီးသီးတစ်လုံးကို ထုတ်ယူလိုက်ပြီး တစ်ကိုက်ကိုက်လိုက်သည်။ ထို့နောက် လှည့်ပြီး ပြန်လျှောက်သွားတော့သည်။ ဆီးသီးက ထိုမျှ အရသာရှိလိမ့်မည်ဟု သူမက ထင်မထားချေ။
ငါ အမှားတစ်ခု လုပ်လိုက်တာပဲ။ ဘာလို့နည်းနည်းလေးပဲ ဝယ်ခဲ့မိတာလဲ။
လူအနည်းငယ်သာလျှင် ရှောင်းလျှိုနှင့် အတွေးတူနေကြသည် မဟုတ်ပေ။ လူများစွာက တစ်ခါ စားကြည့်ရုံဖြင့် ထိုကဲ့သို့ သဘောထားများ ဖြစ်သွားကြသည်။ သူတို့က မြည်းစမ်းကြည့်ပြီး ၎င်းက အရသာရှိသည်ကို တွေ့ရှိသွားကြသည်။ ထို့နောက် ထပ်ဝယ်ရန် ပြန်လာခဲ့ကြသည်။
ရလာဒ်အနေဖြင့် ရှန်းထင်ရွှမ်းဆီမှ ဝယ်ခဲ့သည့် ဆီးသီးနှင့်မက်မွန်သီးများသည် နေ့ခင်း ၃နာရီမတိုင်ခင် ရောင်းထွက်သွားခဲ့သည်။
စွန်းဖျင်က ထိုအသီးနှစ်မျိုးကို ထိထိရောက်ရောက် ကြော်ငြာရန် ဝန်ထမ်းကို ချက်ချင်း ပြောလိုက်သည်။ ပြီးနောက် ဆီးသီးနှင့် မက်မွန်သီး၏ ကြော်ငြာများအား စူပါမားကတ်အဝင်ဝရှိ LED မျက်နှာပြင်ပေါ်တွင် ပြသထားပေသည်။
ကုမ္ပဏီရှိ အိမ်ရာမြေစီမံခန့်ခွဲရေးဋ္ဌာန၏ ခေါင်းဆောင်အနေဖြင့် လုမင်ဟွေ့က စျေးကွက်ဌာနနှင့် ဆွေးနွေးရန် ပြန်သွားခဲ့သည်။ နောက်လာမည့် ဈေးကွက် စာရင်းမှာ ဆီးသီးနှင့် မက်မွန်သီးများ ပါဖို့ လိုအပ်သည်။
လုမင်ဟွေ့ကလည်း သူတို့၏ဌာနအတွက် ဆီးသီးနှင့် မက်မွန်သီးတစ်ပေါင်ကို လက်ဆောင်တစ်ခု အနေဖြင့် ယူသွားခဲ့သည်။
စျေးကွက်ဌာနရှိ လူများအတွက်လည်း ပါသည်။ သူတို့က အရင်ဆုံး အသီးပုံများကို ရိုက်လိုက်ကြသည်။ သူတို့က အသီးများကို အသေအချာ ရွေးနေကြသည်။ သို့သော် ဆီးသီးနှင့် မက်မွန်သီးပုံများကပင် ကြည့်ကောင်းနေသည်ကို သူတို့တွေ့ခဲ့ကြသည်။
“လူကြီးမင်းလုက မဆိုးဘူးပဲ” သူတို့၏အလုပ်တာဝန်များ သက်သာစေရန် လုမင်ဟွေ့က အသီးများကို ဂရုတစိုက် ရွေးချယ်ပြီး သယ်လာခဲ့သည်ဟု လူတိုင်းက တွေးလိုက်ကြသည်။
ပုံက လျင်မြန်စွာဖြင့် ရိုက်ပြီးသွားသည်။ တစ်စုံတစ်ယောက်က မက်မွန်သီးတစ်လုံးကို ယူပြီး စားလိုက်သည်။ “F**** ”
“ဘာလို့လဲ ”
“ဒီမက်မွန်သီးက အရမ်း အရသာရှိတာပဲ” စျေးကွက်ဌာတွင် စုစုပေါင်း လူဆယ်ယောက် ရှိသည်။ တစ်ကတ်တီ၌ မက်မွန်သီး ၃လုံးသာ ရှိသည်။ လုယူရန် နောက်ကျသွားသည့် လူများက ဆီးသီးများကိုသာ ယူကြရတော့သည်။
“ကောင်းပြီ၊ ဒီအသီးစားပြီးတော့ ငါ ကြော်ငြာကို ဘယ်လိုရေးရမလဲဆိုတာ သိသွားပြီ ”
“အလုပ်စလိုက်ရအောင် ”
“လူကြီးမင်းလုက မနက်ဖြန်ကျ ဒါတွေ ထပ်ယူလာပါစေ ”
…
လုမင်ဟွေ့နှင့် သူ၏ကုမ္ပဏီလူတွေအပြင် ကျန်းယုကလည်း သူမမျက်နှာပေါ်တွင် တူညီသည့် မျက်နှာထားရှိနေသည်။ ထိုအရာက အလွန်စိတ်လှုပ်ရှားစရာ ကောင်းပေသည်။ သူမသည် မနက်တုန်းက ဆီးသီးနှင့် မက်မွန်သီးများကို ဝယ်ခဲ့သည်။ နောက်ဆုံးတွင် ထိုအကြောင်းကို တွေးမိပြီးနောက် ဆီးသီးတစ်လုံးကို မြည်းကြည့်လိုက်သည်။ သူမယောက်ျားက မှန်သည်ကို သိရှိသွားခဲ့သည်။ ထိုဆီးသီးများက အမှန်တကယ် အရသာရှိပေသည်။
မက်မွန်သီးများသည်လည်း ထိုနည်း၎င်းပင် ဖြစ်သည်။ သူမ စားခဲ့ဖူးသော အသီးများအားလုံးထက် ပိုပြီး အရသာရှိပေသည်။
……
နှစ်နာရီကြာတိုင်း ရှန်ထင်းရွှမ်က ဆီးသီးတော၊ သို့မဟုတ် မက်မွန်ပင်ဆီသို့ ဝိညာဉ်စွမ်းအင်ဖြင့် ရေလောင်းရန် ပြေးသွားနေရသောကြောင့် သူမ အားမနေခဲ့ပေ။
တာဝန်က နေ့ခင်းတွင် ပြီးမြောက်သွားပြီး သူမ၏ ဝိညာဉ်သွေးကြောကို ၆% ပြန်လည် ရရှိသွားပေသည်။
သန်းခေါင်ကျော်လာသောအခါ စက်သံမြည်လာခဲ့သည်။
“ကျေးဇူးပြုပြီး ၁၂နာရီအတွင်း လူ ၆၄ ယောက်ကို မင်းစိုက်ထားတဲ့အသီးတွေ စားခိုင်းပါ”
ရှန်းထင်ရွှမ်းက အပျင်းဆန့်လိုက်ကာ အိပ်ရာမှ ထပြီး တောင်ပေါ်ရှိမက်မွန်တောအုပ်သို့ ပြေးသွားသည်။ ပြီးနောက် မက်မွန်ပင်တစ်ပင်ကို ရွေးပြီး ရေလောင်းလိုက်သည်။ ထို့နောက် ပြန်လာပြီး ဆက်အိပ်နေလိုက်သည်။
မနက် ၂နာရီတွင် ရှန်းထင်ရွှမ်းက ဆီးပင်တစ်ပင်ကို ရေလောင်းရန် သွားခဲ့သည်။ မနက် ၄နာရီ၌ ရှန်းထင်ရွှမ်းက မက်မွန်ပင်တစ်ပင်ကို ရေလောင်းလိုက်ပြီး ပြန်အိပ်မည့်အစား သူမက အသီးများကို ရိတ်သိမ်းရန် စတင်လိုက်သည်။
မနေ့က နေ့ခင်းတွင် သူမ အပင်မှခူးလာသော အသီးများကို ထည့်ဖို့ ကြီးမားသည့် ရောင်စုံအစင်းကွက်အိတ် အများအပြားကို ဝယ်ရန် စူပါမားကတ်သို့ သွားခဲ့သည်။
ရှန်းထင်ရွှမ်းက ယခု သာမန်လူများထက် ပိုမို သန်မာပြီး သူမ၏ခန္ဓာကိုယ်တွင် ကျွမ်းကျင်မှု အများအပြား ရှိပေသည်။ သူမက သစ်ပင်များစွာ တက်ရလျှင်တောင် မောပန်းသည်ဟု မခံစားရဘဲ အသီးများကို လျင်မြန်စွာ ရိတ်သိမ်းနိုင်ပေသည်။
အသီးတစ်ပင်ရှိ အသီးအားလုံးကို နာရီဝက်အတွင်း ခူးခဲ့ပြီး ၎င်းအောက်တွင် အသီးများဖြင့် ပြည့်နေသော ကြီးမားသည့် အိတ်ကြီးများ ရှိပေသည်။
မနက် ၇နာရီတိုင်အောင် အလုပ်ရှုပ်နေခဲ့ပြီးနောက် ပိုင်းလျန်စူပါမားကတ်မှ လူများ ရောက်လာခဲ့သည်။ သူတို့က တောင်ပေါ်သို့ မောင်းတက်လာခဲ့ပြီး ရှန်းထင်ရွှမ်း ခူးထားခဲ့သည့် အသီးများအားလုံးကို ကားထဲသို့ ထည့်လိုက်သည်။ ယနေ့တွင် သူတို့က ကြီးမားသည့် အလေးချိန်စက်တစ်ခုကို ယူလာခဲ့ပြီး အလေးချိန်ကို မှတ်တမ်းယူထားလိုက်သည်။
သူတို့က အားလုံးကို ကားထဲသို့ တင်ပြီးနောက် ရှန်းထင်ရွှမ်းကို ဆီးသီး ၉၀၃ ကတ်တီနှင့် မက်မွန်သီး ၁၆၀၅ ကတ်တီ၏ မှတ်တမ်းကို ပေးလိုက်သည်။
ရှန်းထင်ရွှမ်းနှင့် အလုပ်လုပ်ပြီးနောက် သူတို့က မောင်းထွက်သွားတော့သည်။ ရှန်းထင်ရွှမ်းက ဆီးသီးတစ်ခြင်းနှင့် မက်မွန်သီးတစ်ခြင်းကို တောင်ခြေသို့ သယ်သွားသည်။ ရှောင်ဖုန်းနှင့် တခြားသူများက တောင်ခြေ၌ စောင့်နေကြသည်။
“ခုပဲ မင်းရဲ့ တောင်ပေါ်ကနေ ထရပ်ကားကြီးတစ်စီး ဆင်းလာတာ မြင်လိုက်တယ် ” ရှောင်ဖုန်းက မက်မွန်သီးများကို ဝယ်နေရင်း ပြောလိုက်သည်။
အချိန်တစ်ခုကြာ အတူရှိပြီးနောက် ရှန်းထင်ရွှမ်းနှင့် ရှောင်ဖုန်းက တစ်ဦးနှင့်တစ်ဦး ရင်းနှီးလာကြသည်။ သူမက ပြန်ပြောလိုက်သည်။ “အဲဒါ ပိုင်လျန်စူပါမားကတ်ကလေ ”
ရှောင်ဖုန်း၏ခေါင်းက အလျင်အမြန်လှည့်လိုက်ပြီး သူက မြန်မြန် တုံ့ပြန့်လိုက်သည်။ “သူတို့က မင်းရဲ့အသီးတွေကို စူပါမားကတ်မှာရောင်းဖို့ လာဝယ်တာလား ”
ရှန်းထင်ရွှမ်းက သာမန်ကာလျှံကာ ခေါင်းညိတ်လိုက်သည်။
ပိုင်လျန်စူပါမားကတ်သည် အတော်အတန် လူသိများပေသည်။ သူတို့ရွာရှိ လူအများစုက ၎င်းတို့ကို သိပြီး သူတို့က ဤသတင်းကို ကြားသောအခါ အနည်းငယ် အားကျသွားကြသည်။ သူတို့စိုက်ပျိုးထားသည့် အသီးများနှင့် အရွက်များကမူ ပိုင်လျန်စူပါမားကတ်သို့ မည်သည့်အချိန်မှ ရောက်နိုင်မည်နည်း။
၉နာရီ၌ လုမင်ဟွေ့က ရောက်လာခဲ့ပြီး ထိုအချိန်တွင် သူနှင့်အတူ စာချုပ်ကို ယူလာခဲ့သည်။
“ငါ မနေ့က အလျင်လိုသွားလို့၊ စာချုပ်ကို ဒီနေ့မှ ယူခဲ့ရတယ်၊ မင်းမှာ တခြားကန့်ကွက်စရာ မရှိဘူးဆိုရင် ဒီမှာ လက်မှတ်ထိုးလို့ရပြီ ”
ရှန်းထင်ရွှမ်းက အကြိမ်အနည်းငယ် ဝေ့ကြည့်လိုက်သည်။ ထို့နောက် လုမင်ဟွေ့လက်မှ ဘောပင်ကို ယူလိုက်ပြီး သူမနာမည်ကို ရေးထိုးလိုက်သည်။
လုမင်ဟွေ့က ရှန်းထင်ရွှမ်း ဂရုတစိုက်မကြည့်တာကို သိပြီး ရှင်းပြလိုက်သည်။
“အနာဂတ်မှာ ငါတို့က အချိန်တစ်ခုကြာ ပူးပေါင်းလုပ်ဆောင်ကြမယ်၊ မင်းရဲ့တာဝန်က အသီးတွေ လတ်ဆတ်ပြီး အရသာရှိနေအောင် ထိန်းသိမ်းပေးဖို့ပဲ၊ ငါတို့က မနက် ၇နာရီတိုင်း အသီးတွေ ဝယ်မယ်၊ ပြီးတော့ ငွေချေဖို့အတွက်ကို နေ့တိုင်း စာရင်းရှင်းမယ် ”
ယေဘုယျအားဖြင့် စူပါမားကတ် အဝယ်တော်များက သေချာပေါက် နေ့စဥ် ငွေပေးချေမှုကို မပြုလုပ်ကြပေ။ လုမင်ဟွေ့နှင့် စွန်းဖျင်တို့ နှစ်ဦးစလုံးက ထိုသို့ပြုလုပ်ခြင်းသည် ကောင်မလေးအတွက် မလွယ်ကူဟု ခံစားခဲ့ရသည်။ ထို့ကြောင့် သူတို့က အထူးခြွင်းချက်အနေဖြင့် ပြုလုပ်ခဲ့ကြသည်။
သတ်မှတ်ထားသည့်အရေအတွက်အတိုင်း ပို့ပေးရမည်ဟူသော အပိုဒ်ကိုလည်း လုမင်ဟွေ့က စာချုပ်မှ ဖယ်ရှားလိုက်သည်။ မိန်းမငယ်လေး ရှန်းထင်ရွှမ်းအတွက် တစ်နေ့ကို ပုံမှန် အသီးကတ်တီထောင်ချီ ထုတ်ပေးရန်က အနည်းငယ် ခက်ခဲနိုင်ပေသည်။
လုမင်ဟွေ့သည် ကြင်နာတတ်သော လူတစ်ယောက်ဖြစ်ပြီး အခွင့်အရေးယူမည် မဟုတ်ပေ။ သို့သော် ရှန်းထင်ရွှမ်းနှင့် အချိန်ကြာ အတူရှိပြီးနောက် ရှန်းထင်ရွှမ်းက အလွန်ဖြူစင်သည်ကို တွေ့ရှိသွားပြီး သူက ရှန်းထင်ရွှမ်းကို သမီးတစ်ယောက်ကဲ့သို့ သဘောထားပေသည်။
ရှန်းထင်ရွှမ်းက “ကောင်းပြီ ”
လုမင်ဟွေ့က တဖန် ပြောလိုက်သည်။ “ပြီးရင် သူတို့က မင်းကို ဒီနေ့ပို့ပေးတာတွေအတွက် ငွေချေကြလိမ့်မယ်၊ သူတို့က နေ့ခင်းလောက်ကျ ငွေလွှဲပေးလိမ့်မယ်၊ စိတ်မပူနဲ့ ”
ငွေအတွက်မူ ရှန်းထင်ရွှမ်းက တကယ်ကို စိတ်မပူပေ။ သူမက ယနေ့ သူမစိုက်ထားသည့် အသီးများကို လူ ၆၄ ယောက် ဝယ်၊ မဝယ်ကိုသာ ပိုပြီး စိုးရိမ်ပူပန်နေသည်။
…
ပိုင်လျန်စူပါမားကတ်ရှိ ဝန်ထမ်းများက အသီးများ ရောက်ရောက်ချင်း စင်ပေါ်သို့ တင်လိုက်ကြသည်။
မနေ့က နေ့လယ်တွင် ရှောင်းလျှိုက သူမဝယ်ယူထားသော အသီးများကို သူမ၏ရုံးသို့ ယူသွားခဲ့သည်။ သူမဘေးရှိ လုပ်ဖော်ကိုင်ဖက် ရှောင်ကျန်းက အနံ့ရသွားပြီး စကားအနည်းငယ် မေးမြန်းခဲ့သည်။
ရှောင်းလျှိုက သူတို့နှင့် ကောင်းမွန်သည့်ဆက်ဆံရေးတစ်ခု ရှိသည်ကို တွေးမိတာကြောင့် သူမက ရှောင်ကျန်းကို ဆီးသီးတစ်လုံးနှင့် မက်မွန်သီးတစ်လုံး ပေးခဲ့သည်။ ပထမတော့ ရှောင်ကျန်းက ရှောင်းလျှိုသည် အနည်းငယ် ကပ်စေးနဲသည်ဟု ထင်မိသည်။ သူက သူမကို ဆီးသီးတစ်လုံးနှင့် မက်မွန်သီးတစ်လုံးကိုသာ ပေးခဲ့သောကြောင့် ဖြစ်သည်။
သူမက အသီးများကို စားပြီးသောအခါ ရှောင်ကျန်းက ရှောင်းလျှိုသည် ကပ်စေးနှဲသည်ဟု အပြစ်တင်ခဲ့သည်မှာ မှားယွင်းကြောင်း တွေ့ရှိသွားသည်။ ဆန့်ကျင်ဘက်အနေဖြင့် ထိုကဲ့သို့ အရသာရှိသော အသီးမျိုးကို တခြားသူအား ခွဲဝေပေးရန် ဆန္ဒရှိသောကြောင့် သဘောထားကြီးသည်ဟုပင် ထင်သွားခဲ့သည်။
နေ့လယ်တွင် ရှောင်ကျန်းက ပိုင်လျန်စူပါမားကတ်ရှိ အောက်ထပ်သို့ သွားခဲ့သည်။ ထို့နောက် ဆီးသီးနှင့် မက်မွန်သီးများ ရောင်းကုန်သွားသည်ကို တွေ့လိုက်ရသည်။ ရှောင်ကျန်းက အနီးတွင်ရှိသည့် တခြားဆီးသီးများကို ဝယ်ခဲ့သည်။ သို့သော် ထိုအသီးများက သူမ နေ့လယ်က စားခဲ့သည့် အသီးများကဲ့သို့ အရသာမဟုတ်ပေ။
ထို့ကြောင့် နောက်နေ့မနက် ၈နာရီ ၅၀မိနစ်တွင် သူမက ပိုင်လျန်စူပါမားကတ်၏ အောက်ထပ်တံခါးသို့ အပြေးသွားခဲ့သည်။ျ
စူပါမားကတ်က ၉နာရီတွင် ဖွင့်သည်။ ပစ္စည်းဝယ်ရန် တန်းစီနေသည့်သူက အများကြီးမရှိပေ။ လူအများစုက အနီးအနားတွင် နေထိုင်သူများ ဖြစ်ကြသည်။ သူတို့က လတ်ဆတ်သည့်အသီးတချို့ကို ဝယ်ရန် စောစောလာခဲ့ကြသည်။
သို့သော် ယနေ့တွင် ပုံမှန်ထက် လူများနေပုံပေါ်သည်။ အများစုက ငယ်ရွယ်သည့်သူများ ဖြစ်ကြသည်။
စူပါမားကတ်က ဖွင့်ဖွင့်ချင်း ရှောင်ကျန်းက စင်ဆီသို့ အပြေးအလွှားသွားခဲ့သည်။ သူမကဲ့သို့ တူညီသည့်လမ်းကြောင်းကို သွားနေသည့် လူက အနည်းဆုံး ၁၀ယောက်ခန့်ရှိသည်ကို သူမ တွေ့လိုက်ရသည်။
ထိုလူများစွာကလည်း ထိုအသီးနှစ်မျိုးသည် အရသာရှိကြောင်း သိပြီးပုံပေါ်ပေသည်။ါ
ရှောင်ကျန်းက တစ်ကတ်တီစီ ဆွဲယူလိုက်သည်။ သူမသည် မူလက ရွေးချင်ခဲ့သည်။ သို့သော် သူမဘေးရှိလူက အသီးတချို့ကို လျင်မြန်စွာ ဆွဲယူပြီး အိတ်ထဲသို့ ထည့်နေပေသည်။
ထို့ကြောင့် ရှောင်ကျန်းကလည်း ထိုအသီးနှစ်မျိုးကို ကြုံရာကျပန်း ဆွဲယူလိုက်ရပြီး ကုမ္ပဏီသို့ ပြန်လာခဲ့သည်။ မနေ့တုန်းက သူမသည် ရှောင်းလျှို ပေးသောအသီးကို စားခဲ့သောကြောင့် ယနေ့ ရှောင်ကျန်းက ဆီးသီးတစ်လုံးနှင့် မက်မွန်သီးတစ်လုံးကို ရှောင်းလျှို၏ စားပွဲပေါ်တွင် ပြန်တင်ပေးထားခဲ့သည်။
ရှောင်းလျှိုက ယနေ့တွင် စီမံကိန်းတစ်ခုအတွက် အပြင်ကို ထွက်သွားခဲ့သည်။ သူမ ပြန်ရောက်လာသောအခါ ထိုအသီးနှစ်လုံးကို တွေ့သွားသည်။ သူမက ချက်ချင်း လှုပ်ရှားလိုက်သည်။
ရှန်းထင်ရွှမ်းက နောက်ဆုံးကျန်သည့်ဝါးများကို ရွှေ့ပြောင်းစိုက်ပျိုးပြီးနောက် သူမက လွှဲငွေ ၂၀၅၆၅ ယွမ်ကို လက်ခံရရှိခဲ့သည်။
သူမက မစ်ရှင်ပြီးမြောက်ကြောင်း သတိပေးချက်တစ်ခု လက်ခံရရှိပြီးနောက် ဝိညာဉ်သွေးကြော ၇%ကို ပြန်လည်ရရှိခဲ့သည်။ သူမ၏ခန္ဓာကိုယ်ထဲ၌ စွမ်းအင်အနည်းငယ်ကို ခံစားလိုက်ရပြီး ရှန်းထင်ရွှမ်းက အလွန် ပျော်ရွှင်နေခဲ့သည်။
ခက်ခက်ခဲခဲလုပ်ကိုင်ရသော ရက်အနည်းငယ်ကို ဖြတ်သန်းပြီးနောက် သူမက ဝါးတောကို သူမ၏တောင်ခြေသို့ တဖြည်းဖြည်း ရွေ့ပြောင်းစိုက်ပျိုးပြီးခဲ့သည်။
ယခု ရှင်းယွမ်ရှန်၏ ဝင်ပေါက်သည် သီးခြားလှပနေပေသည်။
အရှေ့ဝင်ပေါက်တွင် သူမသည် ဖြတ်ထားသော ဝါးများဖြင့် ခြံစည်းရိုးတစ်ခု ပြုလုပ်ထားသည်။ ဝါးတစ်ချောင်းကို တစ်ခြမ်းခြမ်းထားပြီး လုံးဝန်းသည့်ဘက်ခြမ်းကို အပြင်ဘက် မျက်နှာမူထားကာ အဖြူဘက်ခြမ်းကို ရှင်းယွမ်ရှန်ဘက်သို့ မျက်နှာမူထားသည်။
နောက်ထပ် အမာခံဝါးခုနှစ်ချောင်း ရှိသည်။ တစ်ခုစီက တစ်မီတာခန့် ရှိပေသည်။
၎င်းက မြက်ပင်များနီးတူ အကြီးမြန်ပြီး အရင်ကထက် ပိုမိုကောင်းမွန်ပုံ ရသည်။
……
ရှောင်ဖုန်းသည် သူ၏ အမြန်ချောပို့ပစ္စည်းထုပ်က ရောက်လာသောကြောင့် ယနေ့ စောစောပြန်လာခဲ့သည်။
ရွာက အနည်းငယ် အစွန်အဖျားကျသောကြောင့် အမြန်ချောပို့ပစ္စည်းထုပ်ကို သတ်မှတ်ထားသည့် နေရာတစ်ခု၌သာ သွားယူရသည်။ ထိုနေရာသည် ရွာနှင့် အနည်းငယ် ဝေးကွာပေသည်။
သို့သော်လည်း ဝိုင်အမြန်ချောပို့က ရွာသို့ တိုက်ရိုက် ပို့ဆောင်ပေးနိုင်သည်။ သို့သော် သူက ပစ္စည်းထုပ်များကို စုပြီး ရက်အနည်းငယ်ကြာမှ ရွာသို့ အတူ ပို့ပေးသောကြောင့် အချိန်ပိုကြာပေသည်။
ရှောင်ဖုန်းက အရင်တုန်းက သတိမပြုမိခဲ့ချေ။ သို့သော် ရှင်းယွမ်ရှန်က ကြီးကြီးမားမား ပြောင်းလဲနေသည်ကို ယနေ့ ရှာဖွေတွေ့ရှိသွားသည်။ လှပသော ဝါးပင်တန်းက တောင်ခြေ၌ စီတန်းတည်ရှိနေပေသည်။ ယခင်ကကဲ့သို့ လူနေကင်းမဲ့သည့် လက္ခဏာမျိုး မရှိတော့ပေ။
မနီးမဝေး၌ ရှန်းထင်ရွှမ်းက ဝါးများကို ဂရုစိုက်နေပြီး ကောင်းကင်၌ ကြီးမားတောက်ပသည့် နေဝင်ချိန် သဘာဝရှုခင်းက လှပနေပေသည်။ ထိုရှုခင်းက ရှောင်ဖုန်းကို သူ၏ ယာဉ်မောင်းဘေးခုံပေါ်မှ DSLR ကင်မရာကို အမှတ်မထင် ကောက်ယူပြီး မနီးမဝေးက ရှန်းထင်ရွှမ်းကို ရိုက်မိစေသည်။ သူ ပုံတစ်ပုံ ရရှိခဲ့သည်။
သူက ကားကို ပါကင်ထိုးလိုက်ပြီး ရှန်းထင်ရွှမ်းကို ရှာရန် ထွက်လာခဲ့သည်။ သို့သော် ဝိုင်ပို့ဆောင်ရေးကား လာနေသည်ကို သူတွေ့သွားသည်။ ရှောင်ဖုန်းနှင့် ပို့ဆောင်သူက သူ၏အိမ်ရှေ့တံခါးသို့ အတူတကွ ရောက်ရှိသွားသည်။
အရာအားလုံး လုပ်ဆောင်ပြီးနောက် ရှောင်ဖုန်းက ရှင်းယွမ်ရှန်သို့ ကြည့်လိုက်ပြီး ရှန်းထင်ရွှမ်းက ဝင်ပေါက်တွင် မရှိတော့သည်ကို တွေ့လိုက်ရသည်။
ရှောင်ဖုန်းက သူ့စိတ်ထဲတွင် အနည်းငယ် ဆုံးရှုံးသွားရသလို ခံစားလိုက်ရသည်။ သူက တံခါး၌ ခဏကြာ ရပ်နေခဲ့ပြီး ပစ္စည်းထုပ်ကို အထဲသို့ ရွှေ့လိုက်သည်။ ထို့နောက် DSLR ကင်မရာမှ ပုံများကို သူ၏ကွန်ပျူတာထဲသို့ ကူးတင်ရန် ဒုတိယထပ်သို့ ပြန်သွားလိုက်သည်။
နောက်ဆုံးပုံထိကို မောက်စ်ဖြင့် တိုက်ရိုက်ဆွဲယူလိုက်ပြီး Photoshop ကို ဖွင့်လိုက်သည်။ ပြီးနောက် ပုံကို ထည့်လိုက်ပြီး ပုံ၏အစိတ်အပိုင်းတချို့ကို ဖြတ်လိုက်သည်။ အရောင်ကို ညှိလိုက်ပြီး ရှောင်ဖုန်းက ၎င်းကို သိမ်းရန် save ကို နှိပ်လိုက်သည်။
ရှောင်ဖုန်းက တစ်ကိုယ်တော် မီဒီယာသမား တစ်ယောက်ဖြစ်သည်။
သူ အထက်တန်းကျောင်းတုန်းက ပထမဆုံး စမတ်ဖုန်းကို ရရှိခဲ့သည်။ ထိုအချိန်၌ ရှောင်ဖုန်းက ဓာတ်ပုံရိုက်ခြင်းကို စွဲလမ်းခဲ့သည်။ သူ၏ဖုန်းဖြင့် ရိုက်ယူခဲ့သော ပုံများကို ဝက်ဘ်ဆိုဒ်အချို့တွင် တင်ခဲ့ပြီး တစ်ခါတစ်ရံ မူပိုင်ခွင့် အခကြေးငွေအချို့ လက်ခံရရှိခဲ့သည်။
ထိုဝင်ငွေဖြင့် ရှောင်ဖုန်းက သူ့ဘဝမှာ ပထမဆုံး DSLR ကင်မရာကို ဝယ်ယူခဲ့သည်။ ရှောင်ဖုန်းက ဓာတ်ပုံပညာကို ပိုမို စိတ်ဝင်စားလာခဲ့သည်။
DSLR ကင်မရာပိုင်ရှင်တွေက ဆင်းရဲကြတယ် ဆိုသည့် ဆိုရိုးက အမှန်ပင် ဖြစ်သည်။ ရှောင်ဖုန်းက ပိုကောင်းသောမှန်ဘီလူးနှင့် ကင်မရာကို ဝယ်ချင်သည်။ အားလုံးက ငွေအများအပြား လိုအပ်သည်။ ထို့ကြောင့် ရှောင်ဖုန်းက လမ်းပေါ်ရှိ လှပသော အမျိုးသမီးများကို ပုံရိုက်ရန် စတင်ခဲ့ပြီး Weibo အကောင့်တစ်ခုကိုလည်း ဖွင့်ခဲ့သည်။
ပထမက သူသည် ပုံရိုက်ဖို့ ခွင့်ပြုရန် လမ်းပေါ်ရှိ အလှလေးများကို မေးခဲ့သည်။ နောက်တော့ ရှောင်ဖုန်းက အောင်မြင်ကျော်ကြားလာပြီးနောက် လူများစွာက သူ့ကို ပုံများရိုက်ကူးပေးရန် ရှာဖွေလာကြသည်။
နှစ်အနည်းငယ်ကြာပြီးနောက် ကင်မရာ ဝယ်ရန်အတွက် ငွေကို စိုးရိမ်စရာ မလိုတော့ချေေ
ထိုရိုက်ကူးခဲ့သည့် နှစ်များပြီးနောက် ရှောင်ဖုန်းက သူ၏မူလရည်ရွယ်ချက်မှ ဖြည်းဖြည်းချင်း လမ်းကြောင်းလွဲလာခဲ့သည်။ အစပိုင်းတွင် သူက ဖုန်းတစ်လုံးသာ ရှိခဲ့ပြီး သူ ကြိုက်နှစ်သက်တာကိုသာ ရိုက်ခဲ့သည်
နောက်ပိုင်းတွင် ပိုက်ဆံရရန် သူက အခြားသူများ၏လိုအပ်ချက်ကို လိုက်ပြီး ရိုက်ကူးရန် စတင်ရတော့သည်။
ယခု ကွန်ပျူတာပေါ်တွင် ရှိနေသည့်ပုံကို ကြည့်ပြီး ရှောင်ဖုန်းက မျက်ရည်ကျလာသည်။ ဤအရာက သူ၏ မူလရည်ရွယ်ချက်ပင် ဖြစ်သည်။ ထိုကဲ့သို့ ပုံမျိုးက သူ၏နှလုံးသားထဲမှ ရိုက်ကူးချင်ခဲ့သည့် ပုံမျိုးဖြစ်သည်။
သူတို့နှစ်ယောက်က အချိန်အတော်ကြာ တစ်ယောက်နှင့် တစ်ယောက် သိခဲ့ကြသော်လည်း ရှောင်ဖုန်းက ရှန်းထင်ရွှမ်းကို ဆက်သွယ်ရန် အချက်အလက်ကိုပင် မသိခဲ့ချေ။ သူက ရှန်းထင်ရွှမ်း၏နာမည်ကို အင်တာနက်ပေါ်တွင် ရိုက်ရှာလိုက်ပြီး Enter ခေါက်လိုက်သည်။
…
ရှောင်ဖုန်းကဲ့သို့ပင် တခြားသော တချို့လူများကလည်း ရှန်းထင်ရွှမ်း၏သတင်းကို အင်တာနက်ပေါ်တွင် ရှာဖွေခဲ့ကြသည်။
စာရေးသူမှာ ပြောစရာရှိနေပါသည်။
ရှန်းထင်ရွှမ်းသတင်းကို ဘယ်သူတွေ ရှာဖွေနေလဲဆိုတာ မှန်းကြည့်ပါ။
